దక్షిణాది చిత్రసీమలో కాస్టింగ్ కౌచ్‌ను ఎదుర్కొన్నట్లు ‘దంగల్’ ఫేమ్ ఫాతిమా సనా షేక్ మరోసారి స్పష్టం చేసింది. గతంలో తాను చేసిన వ్యాఖ్యలను కొందరు తప్పుగా వక్రీకరించారని, ఒకే ఒక్క వ్యక్తి వల్ల తాను ఇబ్బంది పడ్డానని వెల్లడించింది. ఆ వ్యక్తి ఏజెంట్ లేదా చిన్న నిర్మాత కావచ్చని, అయితే దక్షిణాది సినీ పరిశ్రమ మొత్తాన్ని తాను ఎప్పుడూ నిందించలేదని ఫాతిమా క్లారిటీ ఇచ్చింది. ఒకరి తప్పిదాన్ని సమిష్టిగా పరిశ్రమపై మోపడం సరికాదని ఆమె ఆవేదన వ్యక్తం చేసింది. కాస్టింగ్ కౌచ్ సమస్య కేవలం సినిమా రంగానికే పరిమితం కాదని, అనేక రంగాల్లోనూ ఇలాంటి పరిస్థితులు ఉన్నాయని ఆమె అభిప్రాయపడింది. “మహిళలు ఎక్కడైనా ఇలాంటి అడ్డంకులను ఎదుర్కొంటారు. కానీ, ఆ అడ్డంకులను అధిగమించి ముందుకు సాగుతున్నారు,” అని ఫాతిమా పేర్కొంది. ఈ సమస్యపై ఆమె స్పష్టమైన వైఖరి, సాహసమైన వ్యాఖ్యలు సినీ లోకంలో చర్చనీయాంశంగా మారాయి. ఫాతిమా ధైర్యంగా తన అనుభవాలను పంచుకోవడం యువతకు స్ఫూర్తిగా నిలుస్తోంది.