సెవెన్ హిల్స్ ప్రొడక్షన్స్ బ్యానర్‌పై బిగ్ బాస్ ఫేమ్ గౌతమ్ కృష్ణ హీరోగా, రమ్య పసుపులేటి, శ్వేత అవస్తి హీరోయిన్లుగా నటించిన చిత్రం సోలో బాయ్. నవీన్ కుమార్ దర్శకత్వంలో సతీష్ నిర్మాతగా రూపొందిన ఈ చిత్రం నేడు ప్రేక్షకుల ముందుకు వచ్చింది. త్రిలోక్ సుద్దు సినిమాటోగ్రఫీ అందించగా, ప్రవీణ్ పూడి ఎడిటింగ్ చేశారు. ఇప్పుడు ఈ చిత్ర సమీక్షను పరిశీలిద్దాం.
కథ:
మధ్యతరగతి కుటుంబంలో జన్మించిన ఓ యువకుడు కాలేజీలో ప్రేమించిన అమ్మాయి నుండి ఆర్థిక అస్థిరత కారణంగా విడిపోతాడు. కొంతకాలం తర్వాత ఆ బాధ నుండి బయటపడి, ఉద్యోగం చేస్తూ మరో అమ్మాయిని ప్రేమించి పెళ్లి చేసుకుంటాడు. కానీ, ఆమె కూడా ఆర్థిక ఇబ్బందుల వల్ల విడాకులు తీసుకుంటుంది. ఇలాంటి కష్ట సమయాల నుండి హీరో ఎలా బయటపడతాడు? ఆర్థిక సమస్యలే అతని జీవితంలోని అడ్డంకులకు కారణమా లేక వేరే ఏదైనా ఉందా? అతను చివరికి ఆర్థికంగా స్థిరపడతాడా? ఊహించని సంఘటనల నుండి ఎలా బయటపడతాడు? అతన్ని వదిలేసిన వారు తిరిగి అతని జీవితంలోకి వస్తారా? అతని కుటుంబం చివరికి ఏమవుతుంది? ఈ ప్రశ్నలకు సమాధానాలు తెలుసుకోవాలంటే సోలో బాయ్ చిత్రాన్ని వెండితెరపై చూడాల్సిందే.
నటీనటుల నటన:
గౌతమ్ కృష్ణ కృష్ణమూర్తి పాత్రలో పూర్తి స్థాయి నటుడిగా తన సత్తా చాటుకున్నాడు. ఎమోషనల్ సన్నివేశాల నుండి ప్రతి సీన్‌లోనూ ప్రేక్షకులను ఆకట్టుకున్నాడు. రమ్య పసుపులేటి ప్రియా పాత్రలో తక్కువ స్క్రీన్ టైమ్‌లోనూ గుర్తుండిపోయే నటనతో మెప్పించింది. శ్వేత అవస్తి తన పాత్రకు పూర్తి న్యాయం చేస్తూ అద్భుతంగా నటించింది. హీరో తల్లిదండ్రులుగా పోసాని మురళి, అనిత చౌదరి మధ్యతరగతి కుటుంబ వాతావరణాన్ని సహజంగా పండించారు. భద్రం, షఫీ, చక్రపాణి వంటి నటులు తమ పాత్రల్లో చక్కగా నటించి చిత్రానికి అదనపు ఆకర్షణగా నిలిచారు.
సాంకేతిక విశ్లేషణ:
దర్శకుడు నవీన్ కుమార్ ఒక ఆకర్షణీయమైన కుటుంబ కథాంశాన్ని రూపొందించి, దానిని ప్రేక్షకులకు అందమైన విజువల్స్‌తో అందించడంలో విజయం సాధించాడు. కథ ప్రతి ఒక్కరినీ కనెక్ట్ చేసేలా ఉండటం విశేషం. సినిమాటోగ్రఫీ, పాటలు, బీజీఎం సిచువేషన్‌కు తగినట్లు చిత్రాన్ని మరింత ఉన్నతంగా నిలిపాయి. రాత్రి, పగలు షూటింగ్‌లలో లైటింగ్, బ్యాక్‌గ్రౌండ్ అంశాలు జాగ్రత్తగా రూపొందించబడ్డాయి. నిర్మాణ విలువలు ఉన్నతంగా ఉన్నాయి. నిర్మాత సతీష్ ఎక్కడా రాజీపడకుండా చిత్రాన్ని నిర్మించారు. దర్శకుడు నటీనటుల సామర్థ్యాన్ని పూర్తిగా వినియోగించుకున్నారు.
ప్లస్ పాయింట్స్:
కథ, సంగీతం, పాటలు, నటీనటుల నటన, సంభాషణలు, నిర్మాణ విలువలు.
మైనస్ పాయింట్స్:
కొన్ని సీన్లు, సంభాషణలు అంతగా ఆకట్టుకోలేదు.
సారాంశం:
మధ్యతరగతి కుటుంబాలకు సన్నిహితమైన కథాంశంతో, కుటుంబ సమేతంగా థియేటర్‌లో ఆనందించదగిన చిత్రం సోలో బాయ్.
రేటింగ్: 3/5